 Первое послание к Коринфянам, глава 5
- отнюд слышится в вас блужение, и таково блужение, яковоже ни во языцех именуется, яко некоему имети жену отчую.
- и вы разгордесте, и не паче плакасте, да изьмется от среды вас содеявыи дело сие.
- зане аз убо аще не у вас сыи телом, ту же живыи духом, уже судих, яко тамо сыи. содеявшаго сице сие,
- о имени Господа нашего Иисуса Христа собравшымся вам и моему духу, с силою Господа нашего Иисуса Христа,
- предати таковаго сатане во измождение плоти, да дух спасется в день Господа нашего Иисуса Христа.
- не добра похвала ваша. не весте ли, яко мал квас все смешение квасит,
- очистите убо ветхии квас, да будете ново смешение, якоже есте безквасни. ибо пасха наша за ны пожрен бысть Христос.
- темже да празднуем не в квасе ветсе, ни в квасе злобы и лукавства, но в безквасиих чистоты и истины.
- писах вам в послании, не примешатися блудником.
- и не всяко блудником мира сего, или лихоимцем, или хищником, или идолослужителем. понеже убо должнибы есте были от мира сего изыти.
- ныне же писах вам не примешатися, аще некии, брат именуемь, будет блудник, или лихоимец, или идолослужитель, или досадитель, или пияница, или хищник. с таковым ниже ясти.
- что бо ми и внешних судити. не внутренних ли вы судите,
- внешних же Бог судит. и изьмите злаго от вас самех.
|
Выбор перевода и языка
|
Библия