 Послание к Евреям, глава 8
- Глава же о глаголемых: такова имамы первосвященника, иже седе о десную прстола величествия на небесех,
- святым служитель и скинии истинней, юже водрузи Господь, а не человек.
- Всяк бо первосвященник, во еже приносити дары же и жертвы, поставляемь бывает: темже потреба имети что и сему, еже принесет.
- Аще бы бо был на земли, не бы был священник, сущым священником приносящым по закону дары,
- иже образу и стени служат небесных, якоже глаголано бысть моисею, хотящу сотворити скинию: виждь бо, рече, сотвориши вся по образу показанному ти на горе.
- Ныне же лучшее улучи служение, по елику и лучшаго завета есть ходатай, иже на лучших обетованиих узаконися.
- Аще бо бы первый он непорочен был, не бы второму искалося место.
- Укоряя бо их глаголет: се, дние грядут, глаголет Господь, и совершу на дом израилев и на дом иудов завет нов,
- не по завету, егоже сотворих отцем их в день, в оньже емшу ми их за руку, извести их от земли египетския: зане тии не пребыша в завете моем, и аз нерадих о них, глаголет Господь.
- Яко сей завет, егоже завещаю дому израилеву по онех днех, глаголет Господь, дая законы моя в мысли их, и на сердцах их напишу их, и буду им Бог, и тии будут мне людие.
- И не имать научити кийждо искренняго своего и кийждо брата своего, глаголя: познай Господа: яко вси уведят мя от мала даже и до велика их,
- зане млстив буду неправдам их и грехов их и беззаконий их не имам помянути ктому.
- Внегда же глаголет нов, обветши перваго: а обветшавающее и состаревающееся близ есть истления.
|
Выбор перевода и языка
|
Библия