 Третье послание Иоанна
- Старец гаиеви возлюбленному, егоже аз люблю воистинну.
- Возлюбленне, во всех молюся благоспеятися тебе и здравствовати, якоже благоспеется тебе душа.
- Возрадовахся зело, пришедшым братиям и свидетельствующым твою истину, якоже ты во истине ходиши.
- Болши сея не имам радости, да слышу моя чада во истине ходяща.
- Возлюбленне, верно твориши, еже аще делаеши в братию и в странныя,
- иже свидетельствоваша о твоей любви пред церковию. ихже предпослав достойно Богу, добре твориши.
- о имени бо его изыдоша, ничтоже приемлюще от язык.
- Мы убо должни есмы приимати таковых, да поспешницы будем истине.
- Писах церкви: но первенстволюбец их диотреф не приемлет нас.
- Сего ради, аще прииду, воспомяну его дела, яже творит, словесы лукавыми укоряя нас: и недоволен бывая о сих, ни сам приемлет братию, и хотящым возбраняет, и от церкве изгонит.
- Возлюбленне, не уподобляися злому, но благому. Благотворяй от Бога есть: а злотворяй не виде Бога.
- Димитриеви свидетельствовася от всех и от самыя истины: и мы же свидетельствуем, и весте, яко свидетельство наше истинно есть.
- Многа имех писати, но не хощу чернилом и тростию писати тебе,
- уповаю же абие видети тя и усты ко устом глаголати.
- Мир тебе. Целуют тя друзи: целуи други по имени. Аминь.
|
Выбор перевода и языка
|
Библия